Copy
View this email in your browser

FREGNIR
Fréttabréf Upplýsingar
4.desember 2020

3. tölublað 2020

Morgunkorn 19. nóvember 2020

Morgunkorn nóvembermánaðar var haldið í streymi þann 19. nóvember. Að þessu sinni var fjallað um innleiðingu á nýju kerfi sem mun halda utan um rannsóknir íslenskra vísindamanna, svokallað CRIS (Current Research Information System) kerfi og hefur PURE kerfið frá Elsevier verið valið. Nýja kerfið mun bera nafnið ÍRIS.

Sigurgeir Finnsson verkefnisstjóri á Lbs-Hbs og Ingibjörg Steinunn Sverrisdóttir landsbókavörður kynntu þetta spennandi verkefni á Morgunkorninu sem er aðgengilegt á YouTube-rás Upplýsingar.
 

Morgunkorn Upplýsingar 19. nóvember 2020

Jólagleði Upplýsingar


Í ljósi aðstæðna var því miður ekki mögulegt að halda jólagleði Upplýsingar eins og áætlað var.

Þess í stað vinnur stjórn Upplýsingar nú að því að senda út jólaglaðning sem vonandi mun berast félagsmönnum fyrir jól.

Varst þú ekki örugglega búin/-n að greiða félagsgjaldið?

Bókasöfn í kófinu

Á tímum covid hefur berlega komið í ljós hversu hugmyndaríkt, drífandi og sveigjanlegt starfsfólk safna landsins er. Lausnirnar finnast víða þrátt fyrir að opnunartími hafi víðast hvar verið takmarkaður undanfarið og söfnin hafa boðið upp á góða þjónustu og fjölbreytta viðburði sem aldrei fyrr.

Ritstjórn Fregna vill ólm segja safnafréttir úr Kófinu. Endilega sendið okkur línu á upplysing@upplysing.is ef þið lumið á fregnum úr starfinu.

 

Bókakonfekt barnanna

Bókasafn Reykjanesbæjar hefur eins og önnur söfn leitað nýrra leiða í viðburðahaldi og hefur flest verið leyst með beinu streymi eða upptökum. Þriðjudaginn 24. nóvember síðastliðinn var Menningarkonfekt barnanna haldið. Ár hvert hefur starfsfólk Bókasafns Reykjanesbæjar staðið fyrir Bókakonfekti fyrir börn og fullorðna fyrir jólin. Á viðburðunum hafa höfundar komið og lesið úr nýjustu verkum sínum og tónlistaratriði frá Tónlistarskóla Reykjanesbæjar hafa prýtt dagskrána hátíðlegum blæ.
 
Í ár var ákveðið að halda viðburðina þrátt fyrir takmarkanir og streyma þeim í gegnum veraldarvefinn. Starfsfólk Hljómahallar og  Bókasafns Reykjanesbæjar lögðust á eitt og úr varð glæsileg dagskrá sem streymt var á facebook síðum safnanna tveggja, Reykjanesbæjar og Víkurfrétta.
 
Rithöfundarnir Gerður Kristný, Gunnar Helgason og Björk Jakobsóttir lásu úr nýútkomnum barnabókum sínum og Salka Sól flutti hátíðleg jólalög ásamt gítarleikara.
 
Viðburðinum var vel tekið og hafa nú ríflega 5.200 horft á viðburðinn (sem eru ívið fleiri en hafa lagt leið sína í Bókasafnið sl. ár).

 

Vinnan í Grófinni á covid ári

Burda sníðablöðin taka sig vel út í handavinnuhorninuFyrsta bylgja og söfnum gert að loka. Þetta voru vondar fréttir fyrir mjög marga, en þó verður að viðurkennast að lokunin var kærkomin fyrir starfsmenn Borgarbókasafnsins í Grófinni. Þar var búið var skipuleggja og undirbúa miklar breytingar sem engan veginn var hægt að framkvæma á meðan safnið var opið.
Starfsmenn mættu því galvaskir til vinnu og lærðu að beita verkfærum, smíða og veggfóðra. Heilu safndeildirnar voru færðar á milli hæða. Tón- og mynddeildin fékk meira rými, matreiðslan flutti niður, unglingabækur og myndasögur fóru upp, risastórt upplýsingaborðið á fimmtu hæðinni fékk að fjúka og Burda sníðablöð, nótnablöð og afskrifuð blöð úr myndasögum skreyta nú hina ýmsu veggi.
Notendur safnsins voru mjög ánægðir með breytingarnar og hrósuðu þeim mikið þó þeir væru eðlilega aðeins ringlaðir fyrst um sinn þegar leikritin voru ekki á fimmtu hæð og engar unglingabækur að finna á annarri hæðinni.
 
Sunna Björk Þórarinsdóttir í samsetningavinnuÞað voru önnur verkefni sem tóku við þegar safnið lokaði í annað sinn. Þá var farið að útbúa margvíslega streymis- og rafræna viðburði. Starfsmenn á öllum söfnum Borgarbókasafnsins komu að þeirri vinnu. Og svo var það skemmtilega verkefnið sem við fengum að sinna í þetta skipti þ.e. að leita að pöntuðum bókum og afhenda. Sú þjónusta fékk frábærar viðtökur og pantanalistinn lengdist mikið fyrstu dagana.
Nú þegar við erum búin að gera þessar stóru breytingar, erum við alveg til í að segja skilið við veiruna og hlökkum til að fylla safnið af gestum.
 
Barbara Guðnadóttir, safnstýra í Grófinni

 

Góðar fréttir af bókaútgáfu

Það var ánægjulegt að sjá frétt frá Mennta og menningarmálaráðuneyti um vöxt í bókaútgáfu sem hefur verið stöðugur undanfarin ár.

Sérstaka athygli vekur að mikil aukning er í útgáfu myndskreyttra bóka fyrir börn. Nánar er fjallað um góða stöðu bókaútgáfunnar á vef stjórnarráðsins

 

Vilt þú bjóða fram krafta þína?

Reglulega berast Upplýsingu beiðnir um að skipa fólk úr röðum félagsmanna í nefndir og ráð. Þeir sem hafa áhuga á að bjóða fram krafta sína til slíkra starfa eru beðnir um að láta vita af sér með því að senda póst á upplysing@upplysing.is.

 

 Fregnir af erlendum vettvangi:
 

Mikilvægi bókasafna í þekkingar- 
og lýðræðissamfélagi

Tvisvar á ári hittast fulltrúar norrænu fagfélaga bókasafnanna á fundi. Annar fundurinn er haldinn til skiptis í þeim löndum sem eiga fulltrúa í samstarfinu og hinn fundurinn er haldinn samhliða IFLA ráðstefnunni. Þetta árið var stefnt að fundi í Osló, en vegna heimsfaraldursins var ákveðið að efna til rafræns fundar í ágúst.  Eins og flestir vita, var ekki haldin nein IFLA ráðstefna þetta árið. Boðað var til fundar í janúar á næsta ári, en óvíst er hvort hann geti orðið í Osló eða hvort hann verði einnig rafrænn.

Þótt erfitt sé að hittast sitja fulltrúarnir þó ekki auðum höndum og hafa verið útbúin drög að sameiginlegri yfirlýsingu þessara félaga um mikilvægi bókasafna til að miðla þekkingu, jafna aðgengi að upplýsingum og auka lýðræði. Stjórn Upplýsingar fór yfir drögin og samþykkti fyrir sitt leyti. Ákveðið var að láta þýða yfirlýsinguna á íslensku um leið og hún hefur verið samþykkt af stjórnum allra félaganna. Þá er stefnt að því að senda hana yfirvöldum og fjölmiðlum auk þess að senda hana til félagsmanna Upplýsingar sem geta sent hana áfram, t.d til stjórnenda sveitarfélaga.
 
Twitter
Facebook
Website
Upplýsing á YouTube
© 2020

Upplýsing - félag bókasafns- og upplýsingafræða 

www.upplysing.is
upplysing@upplysing.is


Viltu breyta áskrift þinni?
Hér getur þú breytt áskrift eða afskráð þig af þessum póstlista.


 






This email was sent to <<Email Address>>
why did I get this?    unsubscribe from this list    update subscription preferences
Upplýsing · Pósthólf 8865 · Reykjavík 128 · Iceland

Email Marketing Powered by Mailchimp